Ecuria e mirë e skuadrës shkodrane në tre ndeshjet e fundit, e ka rritur besimin tek suksesi për trajnerin e saj Rudi Vata. Në konferencën e sotme për shtyp, ai është shprehur shumë entuziast për ndeshjen e rradhës që do luhet pasditen e së shtunës në Durrës ndaj Teutës, duke deklaruar se Vllaznia udhëton për fitore në këtë ndeshje. Nga ana tjetër, kuqeblutë kanë analizuar barazimin e fundit me Skënderbeun dhe kanë nxjerrë mësimet e duhura prej tij për të korigjuar gabimet e vërejtura sidomos në mbrojtje. “Teuta është skuadër solide, ka dy specialistë shumë të mirë në krye të saj siç janë Hasan Lika dhe Sulejman Starova, ka një president më konstati nga të gjithë, ka një gjendje të mirë, por të gjithë këta faktorë nuk na frikësojnë. Vllaznia është tashmë një skuadër që prodhon lojë, prodhon gola dhe prandaj shkojmë në Durrës për të fituar”-ka thënë ai.
Vllaznia prej tre ndeshjesh nuk humbet dhe kjo e ka rritur entuziasmin në skuadër, ndërkohë që trajneri Vata deklaron se ka qenë i bindur për rezultatet në rritje të kuqebluve. “Unë kam patur besim gjithmonë tek kthesa e skuadrës sepse në jetën time çdo gjë e kam bazuar tek puna, tek besimi dhe tek durimi prandaj dhe Vllaznia po vjen gjithnjë në rritje”- ka vazhduar më tej Vata. Nga ana tjetër, për ndeshjen ndaj Teutës, në formacionin e Vllaznisë do ketë edhe ndryshime teksa kthehen pas dëmtimeve Kraja dhe Gocaj dhe në këtë mënyrë skuadra pritet të jetë më e fortë, në luftën e saj për të marrë tre pikë në “Niko Dovana”.
www.shkodrasport.com
