Kanë kaluar 20 vite që nga koha kur Uliks Kotrri bëri provë një aventurë në futbollin gjerman, duke veshur për pak kohë fanellën e Energui Kotbus.
Asokohe, dëmtimet penalizuan ish-mesfushorin shkodran që të tregonte më të mirën e tij, duke u aktivizuar shumë pak me klubin e njohur gjerman.
Tani, ai shpreson që djali i tij, Enea, të ketë një karrierë më të suksesshme pasi është regjistruar në akademinë e këtij klubi.
Futbollisti 15-vjeçar ka qenë i ftuar edhe me përfaqësuesen shqiptare U16 për turneun që u zhvillua në San Marino pak kohë më parë, duke treguar atje vlerat e tij.
“Trajneri që drejton përfaqësuesen U16 dëshironte të më shihte të luaja dhe nuk e zhgënjeva, siç më tha vetë më vonë. Shënova gol kundër Armenisë në fitoren 2-0 dhe luajta kundër San Marinos.
Ndaj debutimi im me kombëtaren ishte me sukses”, ka treguar djaloshi i regjistruar me ekipin e të rinjve për kampionatin rajonal në Kotbus.
Edhe vetë Uliks Kotrri kalon kohën i ndarë mes Shqipërisë dhe Gjermanisë, pasi ka blerë shpi dhe jeton në Kotbus me familjen.
“Pasi braktisa futbollin e luajtur, u bëra menaxher futbollistësh në vendlindje. Kjo është arsyeja pse udhëtoj shpesh nga Gjermania në Shqipëri.
Por ndjek gjithmonë me vëmendje karrierën e djalit tim”, shpjegoi Kotrri. /vipsport/
