Të premten në orën 16.30 në stadiumin “Selman Stërmasi” të kryeqytetit do të luhet ndeshja play-off në mes Veleçikut dhe Shkumbinit.
Koplikasit vijnë në këtë sfidë si skuadra e dytë në grupin A të kategorisë së dytë dhe sipas rregullores do të ndeshen me skuadrën e parafundit të grupit B të kategorisë së parë, që është ajo peqinase.
Duhet thënë se djemtë e drejtuar nga Besnik Duli kanë bërë një kampionat shumë të mirë sivjet dhe ndonëse nuk arritën të dalin direkt një kategori më lart, sërish e kanë këtë objektiv.
Ata janë të bindur se do ia dalin të fitojnë ndaj Shkumbinit, ndonëse në pamje të parë kemi të bëjmë me një emër të rëndësishëm të futbollit shqiptar, që për shumë vite ka qenë edhe pjesë e Superligës.
Por në Koplik kanë besim se do ia dalin. Ndërkohë Bashkia e këtij qyteti që është financuesja e ekipit, mësohet se ka vënë në dispozicion të tifozëve katër autobuzë për udhëtimin e tyre drejt Tiranës për të mbështetuar skuadrën e zemrës.
“Selman Stërmasi” kësisoj të premten me siguri do të ushtojë nga brohoritjet e tyre që duhet të jenë një nxitje për futbollistët në fushë,për ta kurorëzuar me sukses këtë finale të tyre.
© shkodrasport.com
