Nga dita e djeshme ekipi i Vllaznisë ka nisur përgatitjet për ndeshjen e rradhës me Veleçikun. Kjo e fundit do të luhet ditën e shtunë në orën 13.30 në fushën sportive “Reshit Rusi” ku pritës janë këtë herë koplikasit. Ekipi shkodran e ka nisur javën e përgatitjeve me një analizë të ndeshjes së kaluar, asaj ndaj Besëlidhjes dhe sigurisht që kundrejt lojtarëve nuk kanë munguar as kritikat për atë barazim të rregjistruar në minutat shtesë të lojës.
Trajneri Lika ua ka bërë të qartë edhe njëherë atyre se kampionati është shumë i vështirë dhe gabime të tilla mund t’i kushtojnë skuadrës për arritjen e objektivit që ka. Për këtë arsye, padyshim që ndaj Veleçikut ditën e shtunë do të synohet vetëm fitorja.Nga ana e tij këtë objektiv për ta fituar ndeshjen do të ketë edhe ekipi i Veleçikut.
Futbollistët e tij duken shumë të motivuar sidomos pas fitores që kanë arritur ditën e djeshme në Fushë- Krujë ndaj Ilirisë vendase. Koplikasit në këtë mënyrë bënë atë që nuk mundi dot ta bënte as Vllaznia për të marrë pikë në këtë fushë, madje duhet thënë se ekipi shkodran pikërisht aty e ka pësuar humbjen e vetme të këtij kampionati.
Me fitoren e djeshme Veleçiku është rikthyer sërish në pesëshen e parë të renditjes dhe për këtë arsye, do të tentojë deri të fund ta mbajë atë. Por, për të arritur këtë objektiv, duhet pikësëpari që të marrë pikë ndaj Vllaznisë.
Natyrisht që nuk do të jetë e lehtë por edhe e vështirë jo sepse kujtojmë që në fazën e parë ekipi shkodran e ka mundur me shumë vështirësi me rezultatin e ngushtë 1-0. Tifozët e Veleçikut pritet ta mbështesin fort skuadrën e tyre në këtë ndeshje, duke shpresuar në marrjen pse jo edhe të fitores.
© shkodrasport.com
