Java e parë e fazës së dytë të kampionatit të kategorisë së parë starton këtë fundjavë dhe ndeshja më me interes duket se do të jetë ajo që do të luhet në fushën sportive “Reshit Rusi”. Bëhet fjalë për takimin “Vllaznia B”- Egnatia. Këto dy skuadra kujtojmë që vijnë nga kategoria e dytë teksa zunë vendin e parë dhe të dytë në renditje kampionatin e kaluar ndërkohë që rivaliteti duket se vazhdon sërish. Në fazën e parë, rrogozhinasit kanë fituar me rezultatin 1-0 ndërkohë që shkodranët tashmë kërkojnë të marrin revanshin e tyre.
Në fakt, interesi më i madh për këtë takim qëndron tek rëndësia e tij. Egnatia nëse nuk fiton në Shkodër heq përfundimisht dorë nga prentendimet e tyre për vendin e parë. Po ashtu, “Vllaznia B” nëse nuk e fiton këtë ndeshje, do ta ketë të vështirë të arrijë objektivin e saj për t’u renditur në mes pesë ekipeve të para të renditjes. Ndeshja do të luhet ditën e dielë në orën 13.00. Spostimi i saj është bërë ngaqë ditën e shtunë në fushën “Reshit Rusi” do të luhen ndeshjet shumë të rëndësishme të Akademisë Vllaznia ndaj ekipeve respektive të Internacionalit.
© shkodrasport.com
