Kamza mban vendin e 7-ë në klasifikim 3 javë para mbylljes së kampionatit, me pikë të barabartë me Teutën, por rrezikohet jo pak për të rënë në Kategorinë e Parë.
Barazimi në Shkodër i ka dhënë zemër ekipit të trajnerit Julian Ahmataj, që nesër synon fitoren.
Ndeshja me Flamurtarin është shumë e vështirë dhe për ta kaluar me sukses, drejtuesit e Kamzës kanë vendosur që hyrja e tifozëve në stadium të jetë falas.
Kamza ka nevojë për sa më shumë mbështetje dhe me ndihmën e tifozëve shpresohet se do t’ia arrijë qëllimit për të marrë tri pikët në këtë 90-minutësh vendimtar.
Një ditë më parë është shpërndarë edhe shpërblimi i barazimit me Vllazninë, ndaj dhe lojtarët janë mjaft të karikuar.
Duke ditur që rivalët kanë ndeshje të vështira, pasi Vllaznia luan me Partizanin dhe Teuta me Skënderbeun, kamzalinjtë duan ta fitojnë me çdo kusht ndeshjen me Flamurtarin.
Trajneri Julian Ahmataj nuk ka të gatshëm mbrojtësin e majtë, Vangjel Zguron, për shkak kartonësh, por rikthehet nga skualifikimi japonezi Masato Fukui. / Vipsport/
