Gabriel Kulla është sulmuesi shkodran që po i “çmend” të gjithë drejtuesit te kuqezinjtë e vegjël. Ky futbollist hyri pak kohë më parë në historinë e futbollit italian si lojtari me moshën më të re që shënon në një ndeshje ku luajnë të rriturit. Vetëm 15-vjeç ishte Kulla kur shënoi golin e fitores për ekipin e tij, Sasa Marconi në Itali.
Por nëse mendoni se ky fakt është tërësisht i parëndësishëm, kthehemi pak te ndeshja sot. Shqipëria U-17 e drejtuar nga Andrea Tedesco ka fituar me shifrat 3-2 ndaj Polonisë U-17. Një tjetër fitore me përmbysje, atje ku Gabriel Kulla tregoi sërish të gjithë klasin e tij. Teksa shifrat ishin 0-1 në favor të miqëve, nga një goditje dënimi, Gabrieli realizoi një predhë të vërtetë që nuk kishte portier i cili mund ta ndalonte.
Nëse mendoni se ky rast ishte thjesht një rastësi, atëherë mund të shikoni golin e fundit që Kulla kishte realizuar me fanellën e Shqipërisë U-17 kundër Ishujve Faroe. Një tjetër gol nga goditja e dënimit, madje në një distancë edhe më të largët. Kjo tregon saktësisht se për çfarë lojtari jemi duke folur. Sulmuesi 16-vjeçar është pjesë e të rinjve të Sassuolos dhe duket një Armando Broja i ri te Shqipëria. Kjo pasi statistikat e tij janë të ngjashme me atë të Brojës. Në 11 ndeshje të zhvilluara deri tani me Shqipërinë U-17, shkodrani ka realizuar plot 11 gola. Një makineri e frikshme goli.
Por ndaj Polonisë nuk u mbyll aty pasi 16-vjeçari realizoi edhe golin e tij të dytë në këtë takim. Në minutën e 66-të, Kulla mori një pasim të bukur nga shoku i ekipit. Por golat e lehtë nuk janë për të, Gabrieli zgjodhi që të bënte një lëvizje spektakolare në zonë duke gënjyer kundërshtarin dhe më pas duke gjetur sërish rrjetën. Ky ishte goli i 11-të i sulmuesit shkodran me fanellën e kuqezinjëve U-17, ndërsa kalimi i tij tek Shpresat është vetëm çështje koha. Shqipërisë po i vjen një yll i madh në Kombëtare, mbajeni shënim, Gabriel Kulla quhet! (sport-ekspres)
STATISTIKAT E GABRIEL KULLËS ME KOMBËTAREN U17:
18.04.2024 Slloveni- Shqiperia U17 1-2 (G.Kulla 2 gola)
22.05.2024 Mali Zi- Shqiperia U17 3-1 (G.Kulla 1 gol)
24.05.2024 Shqiperia U17 – Mali Zi 0-0
17.06.2024 Shqiperia U17 – Azerbajxhan 1-1
19.06.2024 Shqiperia U17 – Azerbajxhan 4-1 (G.Kulla 2 gola)
04.09.2024 Shqiperia U17 – Luksemburg 3-1 (G. Kulla 2 gola)
06.09.2024 Shqiperia U17 – Luksemburg 0-3
09.10.2024 Shqiperia U17 – Kroaci 1-1 (G. Kulla 1 gol)
12.10.2024 Shqiperia U17- Hollanda 0-5
15.10.2024 Shqiperia U17- Ishujt Faroe 1-0 (G. Kulla 1 gol)
15.11.2024 Shqiperia U17- Polonia 3-2 (G. Kulla 2)
