Nga Maringlen ZHIVANI
Vllaznia do të tentojë rikthimin tek fitorja pas dy humbjeve të fundit. Në daljen e zakonshme për mediat në prag të sfidës me Elbasanin që do të luhet të dielën në “Loro Boriçi”, trajneri Thomas Brdariç i ka idetë e qarta, teksa tha se Vllaznia do të rikthehet te fitorja në ndeshjen ndaj Elbasanit.
“E dimë situatën tonë. Kemi pasur disa ulje-ngritje gjatë këtij sezoni dhe objektivi jonë është të rikthehemi me fitore. Kemi pasur pak kohë për ta përgatitur këtë ndeshje. Duhet të tregojmë një performancë mjaft të mirë ndaj Elbasanit. Me kushtet që kemi, po bëjmë maksimumin, teksa pavarësisht dy humbjeve të fundit, jo çdo gjë ishte e keqe.
Duhet më shumë agresivitet dhe më shumë energji. Duhet të luftojmë taktikisht. E dimë që trajneri i ri i Elbasanit, Gvozdenoviç do ta nisë me fitore, por ata kanë disa futbollistë që mungojnë, ashtu siç i kemi edhe ne. Duhet të punojmë që momenti të jetë në krahun tonë. Kjo është kryesorja në futboll. Duhet të tregojmë fytyrën tonë më të mirë me Elbasanin.”
Brdariç komentoi edhe dëmtimet, të cilat do t’i ketë të shumta në ndeshjen me Elbasanin.
“Nuk do ta kemi ekipin e plotë me Elbasanin, por do jemi një ekip kompetitiv. Jam i sigurtë që me Elbasanin do të kemi një reagim pozitiv nga skuadra. Kemi shumë probleme me dëmtimet. Infermieria është plotësisht e mbushur me futbollistë të dëmtuar. Stafi mjekësor po mundohet të bëjë më të mirën për t’i rikthyer sa më shpejt futbollistët, por nuk është e lehtë. Është një problem i madh për ne, por nuk kemi mundësi për t’u ankuar dhe duhet të shikojmë përpara.
Normalisht, situata e dëmtimeve është diçka që nuk na pëlqen as neve, as dikujt tjetër. Asnjë ekip në Shqipëri nuk e ka skuadrën e plotë. Të gjithë kanë dëmtime. Mund të flasim për ngarkesa apo për kushtet e stërvitjes dhe fushën ku ne stërvitemi, por çfarë të them. Nuk mund të ankohem. Këto janë kushtet që kemi. Duhet të jemi sa më pozitiv dhe të luftojmë për një rezultat sa më të mirë me Elbasanin”.
Ndeshjen me Elbasanin, Vllaznia do ta luajë të dielën në “Loro Boriçi”, duke nisur nga ora 16:30./www.shkodrasport.com/
