Mesfushori Edon Hasani u largua me shumë diskutime nga skuadra e Vllaznisë në janarin që lamë pas.
Shkodrani la ekipin kuqeblu për një aventurë në Iran, te skuadra e Sepahanit. Ekip ky që nuk është emër i padëgjuar për shqiptarët, pasi aty luante dhe sulmuesi tjetër Xhevahir Sukaj.
Aventura e Hasanit te Sepahani po shkon në mënyrën e duhur në aspektin personal, pasi skuadra e tij ka vështirësi këtë sezon.
Momentalisht, ekipi i tij ndodhet në vendin e 11-të dhe rrezikon rënien nga kampionati iranian. Skuadra iranine ndodhet vetëm 4 pikë larg rënies. Kampionati iranian është ndalur momentalisht, pasi skuadrat janë në fazën përgatitore.
Sephani do të rikthehet të luajë më 31 mars, deri atëherë ekipi i mesfushorit shkodran po zhvillon miqësore të ndryshme.
Ndeshja e fundit miqësore ishte ditën e djeshme, ekipi i Sephanit fitoi me rezultatin 5-1 dhe një ndër golat u shënua nga Hasani.
Shkodrani shënoi golin e dytë në këtë miqësore. “Kishim miqësore, pasi jemi në fazën përgatitore dhe shënova gol në miqësoren që zhvilluam. Luanim me një ekip të Kategorisë së dytë dhe shënova golin e dytë.
Jam në formë të mirë dhe po luaj mirë. Nuk kam patur probleme me dëmtimet dhe po jap maksimumin tim. Titullar? Deri tani kam luajtur si titullar.
Në miqësore po futem nga minuta e parë dhe pavarësisht ndërrimit të trajnerit kam vazhdimësi”, – shprehet fillimisht Hasani për Eduasportin.com.
“Irani është një kampionat i bukur, por dhe i vështirë. E prisja në fakt, pasi mora informacione të bollshme para se të vija këtu.
Atmosfera është e zjarrtë dhe tifozët janë të çmendur për ekipin. S’kishte faj Sukaj kur më tregonte për situatat këtu.
Tani më mbetet të tregoj veten në çdo ndeshje dhe të jap maksimumin tim. Besoj se do të bëjmë më mirë dhe në kampionat. Na kanë mbetur 5 ndeshjet e fundit të sezonit. Takimin e parë e kemi më 31 mars”, – shprehet Hasani. /EDS/
