Shmanget tragjedia në Serinë B, ku një ndeshje futbolli sot ka zgjatur vetëm 4 sekonda lojë në total para se të vendosej shtyrja e saj për shkak të dëmtimit të një futbollisti. Në stadiumin “Via del Mare” të Leçes ka ndodhur një situatë e pabesueshme vetëm 4 sekonda pasi gjyqtari kishte vërshëllyer për fillimin e sfidës mes ekipit vendas dhe Askolit.
Mesfushori Manuel Skavone, pas një kontakti në ajër, ka rënë në tokë pa ndjenja duke u përplasur shumë keq. Shokët e skuadrës dhe kundërshtarët vrapuan ta ndihmonin për t’i dhënë ndihmën e shpejtë, ndërsa në fushë u fut edhe ambulanca e cila bëri të mundur transportimin e tij në spital.
Por ajo që kishin parë lojtarët në fushën e lojës i kishte lënë të tronditur e në një situatë të tillë u kërkua ndërprerja e takimit dhe zhvendosja në një datë tjetër.
Të dy palët ishin dakord, edhe pse më pas erdhën lajmet qetësuese se Skavone ishte i ndërgjegjshëm dhe kishte marrë pak veten. Pas vetëm 4 sekondash lojë efektive, ndeshja u quajt e ndërprerë dhe do të rifillojë në një datë për t’u caktuar. /vipsport/
