Teuta është ndarë sot në një barazim 1-1 ndaj Laçit, në një ndeshje shumë të luftuar që mbajti gjithçka hapur deri në vërshëllimën përfundimtare. Por skuadra durrsake pretendon se është dëmtuar nga vijërojtësit në takimin e sotëm, duke marrë shkas nga pozicioni i dyshimtë i Shtubinës në momentin kur dërgoi topin në rrjetë.
Durrsakët protestuan në stadium pas golit të shënuar nga kundërshtarët, ndërsa më pas, kanë zgjedhur rrjetet sociale për të treguar pakënaqësinë e tyre.
Në Instagram, klubi ka publikuar një video ku shfaq edhe momentin e golit, duke vendosur edhe vijën imagjinare që tregon pozicionin më të avancuar të Shtubinës në momentin kur niset pasimi nga Fangaj.
“Turp” është mesazhi i vetëm që shoqëron këtë video të ndeshjes për një episod që i hoqi mundësinë Teutës që të kishte sigurinë e vendit të dytë në klasifikim pas gjysmës së parë të kampionatit. /vipsport/
