Dy ndeshje- dy fitore dhe vendi i parë në renditje. Basania e ka nisur me vrull kampionatin e sivjetëm duke u shfaqur menjëherë si pretendente. Në mesjavë mundi Kinostudion 3-1, ndërsa sot fitoi 2-1 ndaj Përmetit në ndeshjen e luajtur në fushën sportive të Bushatit.
Trajneri Fatjon Hasanaj duke folur për gazetën “Shkodra Sport” pas ndeshjes u shpreh i kënaqur me startin e kampionatit dhe premtoi që skuadra e tij do të jetë një rivalizuese e fortë për kreun deri në fund.
“Nuk ishte një fitore e lehtë sepse ndeshja kaloi në disa episode dhe u vumë pak në vështirësi por e rëndësishme është që ia dolëm. Luanim në fushën tonë dhe kishim edhe pak emocione por duhet të shohim përpara. I kemi bërë një nisje të mirë kampionatit me dy fitore në dy ndeshje.
Ekipi funksionon kjo është e rëndësishme, kemi rrugë të gjatë për të bërë sepse ka edhe shumë ndeshje. Basania do të luftojë deri në fund. Për mua si trajner vlen loja e ekipit, krijon sulme në mënyrë të rrjedhshme dhe kështu erdhën edhe sot golat. Vërtetë Përmeti na vuri pak në vështirësi me topat pas shpine, por kishim gjithçka në dorë.
Kemi punuar fort prej dy muajsh, ka shumë lojtarë cilësorë në ekip por presim që të rriten edhe më shumë në ndeshjeyt në vazhdim. Po bëjmë ndeshje të mira dhe shpresoj shumë që të ecim me këtë ecuri. Kemi një gërshetim të lojtarëve me përvojë me lojtarët e rinj.
Më duhet të përmend Shimajn, Shemën, Lekën, pa lënë mënjanë mbrojtësin e djathtë- Zefin që bëri një ndeshje shumë të mirë, kemi Nikshiqin që ka qenë më përpara edhe te Vllaznia por kishte një problem dëmtimi dhe e aktivizuam vetëm në pjesën e dytë, ndërkohë që Mila po bën mirë në sulm. Ai është një lojtar inteligjent dhe më vjen mirë që del te goli sepse gjithmonë kur shënon, i bën të bukur. E rëndësishme është që Basania po funksionon dhe ecim drejt objektivit tonë- eshte shprehur trajneri Hasanaj.
Te plote prononcimin e tij mund ta ndiqni ne kanalin zyrtar te gazetes “Shkodra Sport” ne youtube duke klikuar ne linkun e meposhtem:
