Shumë tifozë të Anderleht pyesin javë pas jave se pse Kristal Abazaj nuk ka shkelur ende fushën e lojës me fanellën e skuadrës në ndeshje zyrtare në këtë sezon.
Futbollisti shqiptar ishte prezantuar si një zbulim në radhët e klubit dhe shihej si një nga talentet më premtues nga drejtuesit.
Shumë pikëpyetje janë ngritur edhe kur emri i tij u la jashtë listës së Europa League për fazën në grupe të turneut ku merr pjesë klubi belg.
Të gjitha këtyre pyetjeve u ka dhënë përgjigje sot Luk Devroe, drejtori sportiv i klubit, para transfertës në Trnava të skuadrës për ndeshjen e parë. Ai ka shpjeguar se pse Abazaj, bashkë me Axhiç, nuk ishin përfshirë në listën europiane.
“Crvena Zvezda barazoi me Napolin dhe duhet ta dini që Axhiç ishte pjesë e asaj skuadre që u shpall kampione në Serbi. Disa lojtarë kanë nevojë për më shumë kohë.
Ai është vetëm 19-vjeç dhe mbylli sezonin e kaluar me një dëmtim që e la jashtë fushave për 6 javë, ndaj nuk ishte gati për përgatitjen e fortë fizike të Vanhaezebruk.
E njëjta vlen edhe për Abazajn. Ai ka pësuar tërheqje si pasojë e ritmit të stërvitjes dhe intensitetit, i cili është shumë më i lartë se në Shqipëri. Por jemi të bindur se puna e tij do të sjellë fryte”, ishin fjalët e drejtuesit të Anderleht. /vipsport/
