Pas ndeshjes me Kastriotin, drejtuesit e lartë të Vllaznisë kanë akuzuar ashpër dy prej gjyqtarëve të kësaj ndeshje, kryesorin Albano Janku dhe anësorin Arben Pregja. Sipas administratorit të klubit shkodran Kujtim Shaba, do kërkohet përjashtimi i përjetshëm i tyre. “Do kërkojmë sot me anë të një shkrese zyrtare pranë FSHF-së përjashtimin e këtyre dy gjyqtarëve, Albano Jankut dhe Arben Pregjës.
Ata njihen si të korruptuar dhe po ashtu janë në fund të karrierës së tyre, çka do të thotë se tani e kanë lëshuar pa duar. Në Krujë ata na kanë vjedhur, sepse së paku duheshin nxjerrë dy futbollistë të Kastriotit me të kuqe, pse jo me karton të zi nëse ka për Cacën”-thotë Shaba. Por a ka prova për këto akuza të rënda që ai lëshon? Përgjigja është pohuese kur thotë: “Kam provat e mjaftueshme për t’u treguar të gjithëve se këta dy gjyqtarë janë të korruptuar dhe këto prova do t’i bëj prezent në Federatë ditën e mërkurë në ballafaqimin që do kem me gjyqtarët dhe drejtuesit e Federatës”.
