Vllaznia dëshiron të lërë pas njëherë e mirë humbjen e fundit me Laçin. Analiza e zhvilluar në mes drejtuesve të klubit dhe atyre të stafit teknik, bashkë edhe me futbollistët, duhet të ketë nxjerrë edhe shkaqet që çuan në atë humbje por edhe lojë të dobët. Vetë klubi nuk ka patur dëshirë të japë detaje nga analiza e zhvilluar megjithatë për të, e rëndësishme është të shikohet përpara sepse në prag është ndeshja e rradhës, ajo me Teutën. Sipas njoftimit të Federatës, ky takim do të luhet të dielën në orën 13.00 në fushën sportive “Reshit Rusi”.
Drejtuesit e Vllaznisë dhe futbollistët e saj, kanë kërkuar që të shohin përpara. Me Teutën padiskutim që duhet fituar patjetër megjithatë nuk kemi të bëjmë me një ndeshje aspak të lehtë. Durrsakët edhe sezonin e kaluar, i kanë rrëmbyer dy fitore shkodranëve brenda në fushën e tyre. Me të njëjtin objektiv do të vijnë edhe këtë të dielë por dhe Vllaznia e ka ndeshje “për jetë a vdekje” dhe sigurisht që do të kërkojë vetëm fitoren. Për ta arritur këtë, natyrisht që duhet parë një skuadër krejt ndryshe në fushën e lojës dhe stafi teknik këtë gjë po kërkon: të rikthejë ekipin e katër javëve të para të kampionatit.
© shkodrasport.com
