Dy pozicione jashtë loje të dhënë gabimisht në dëm të Vllaznisë, por edhe një gol i anuluar ndaj Apolonisë, kanë bërë që drejtuesit e klubit shkodran të jenë të ashpër dhe të reagojnë fuqishëm për gjykimin.
Jo vetëm për mes mediave, por klubi shkodran ka bërë një ankesë konkrete drejtuar organeve kompetente në FSHF.
Nga sa bëhet e ditur nga juristi Blendi Dibra, i cili njëherësh është sekretar i klubit, i vendosur nga donatori Alban Xhaferri, Vllaznia ka bërë një ankimim në zyrat përkatëse të FSHF-së për arbitrimin, ku natyrisht pretendimet janë për vendimet e anësorit Ani Koçiaj.
Sipas Dibrës, ajo që ka shumë rëndësi është marrja e masave në mënyrë që kjo të vlejë për të ardhmen, pra që gjykime të tilla të mos përsëriten. Për fat të mirë vendimet e anësorit Koçiaj nuk ndikuan në rezultat, pasi Vllaznia shënoi dy gola.
