Ditën e sotme është pritur të kishte ndonjë reagim nga ana e klubit shkodran në lidhje me incidentin e ndodhur në fundin e ndeshjes Vllaznia- Skënderbeu pasditen e së enjtes në stadiumin “Loro Boriçi” me trajnerin e Skënderbeut Stanislav Levi. Siç është bërë e ditur, trajneri dhe ndihmësi i tij janë gjuajtur me topa bore në momentin kur ai po intervistohej nga gazetari i “Supersport” Ylli Aga menjëherë pas ndeshjes. Nëse kjo nuk do kishte qenë “live” në ekranin e TV ndoshta nuk do kishte bërë kaq shumë bujë megjithatë tashmë është një incident që “ka marrë dhenë”. Por nëse kamerat kanë dhënë saktësisht atë çfarë ka ndodhur me topat e borës apo dhe kalimin hekurave të një tifozi dhe vrapimin e tij në pistë drejt trajnerit çek, për çudi kamerat nuk kanë filmuar e dhënë gjestin shumë të turpshëm që ka bërë ndihmësi i Levit, pikërisht Lorenc Hysi që pas gjuajtje me topa bore, ka sharë tifozët shkodranë madje, nuk ka hezituar të prekë edhe organet gjenitale për të çuar edhe më tej reagimin e tij. Pikërisht ky veprim i tij në pistën e stadiumit, ka bërë që tifozi të kalonte hekurat e rrethimit dhe të kalonte në pistë. Kjo nuk është dhënë nga kamerat dhe prandaj i gjithë faji mbet në anën e tifozit. Me këtë kurrsesi nuk mund të justifikojmë veprimin e tij, por ai ka qenë një veprim i ardhur pas një shkaku. Ajo çfarë duhet evidentuar është padyshim reagimi i drejtorit teknik të Skënderbeut Ilirjan Përmeti që ka reaguar ashpër ndaj ndihmëstrajnerit të ekipit të tij Hysi për gjestin e bërë. Sot ndoshta pritej edhe një reagim i klubit shkodran për incidentin e ndodhur por ky reagim nuk ka ndodhur.
www.shkodrasport.com
