Ndërprerja e kampionatit të Superligës ka rezultuar e favorshme jo vetëm për ekipin e parë të Vllaznisë por edhe për të dytin.
Kjo sepse disa lojtarë të saj do të jenë sot në dispozicion të trajnerit Ervis Kraja për ndeshjen ndaj Besës që do të luhet në orën 14.00 në fushën sportive “Reshit Rusi”.
Kështu, në formacionin e “Vllaznia B” do të jenë për këtë takim edhe tre mbrojtësit e ekipit të parë, pikërisht Olsi Gocaj, Ergis Mersini dhe Erdenis Gurishta.
Çka do të thotë se në mbrojtje ky ekip do të jetë “i blinduar”.
Të mos harrojmë se pjesë e Vllaznisë B janë edhe futbollistë të tjerë që stërviten me ekipin e parë si Hajdari, Ruqi, Kapaklija e Pusi dhe në këtë mënyrë shanset janë të mëdha që ekipi i dytë i klubit shkodran të fitojë ndaj kavajasve sot.
Një fitore që do të ishte shumë e nevojshme për daljen nga fundi i tabelës së renditjes ku ndodhet aktualisht.
www.shkodrasport.com
