Miqësorja e fundit e Vllaznisë në prag të nisjes së sezonit të ri, ajo e luajtur pasditen e sotme në Tuz ndaj Deçiçit vendas, është mbyllur në barazim 1-1. Të parët kanë shënuar shkodranët me anë të Krujës në ’15 ndërsa kanë barazuar tuzianët me një autogol të mbrojtësit të kuqebluve Mehmedaj në ’72 të pjesës së dytë. Përgjithësisht ka qenë një ndeshje pozitive ndonëse shkodranët kanë patur disa mungesa.
Në portë në këtë takim ka luajtur korçari i ardhur nga Greqia- Melka. Në mbrojtje, nga e djathtë Gurishta, në qendër Pjeshka dhe Marku ndërsa në të majtë është aktivizuar Ruqi. Sakaq në repartin e mesfushës ka luajtur Tafili, Bardulla e Vucaj ndërsa në rolin e mesfushorëve të avancuar kanë qenë Lika e Kruja kurse në majë të sulmit në këtë takim është provuar Kalaja në mungesë të ganezit Atsina që ka qenë i dëmtuar. Goli i kuqebluve ka qenë model për nga mënyra e ekzekutimit. Vucaj e Lika bëjnë gjithçka mirë në mesfushë dhe topi i krosuar nga e djathta ka përfunduar tek Kruja që e ka ndjekur me vëmendje aksionin duke e dërguar topin në rrjetë. Thuajse e njëjta situatë në rastin e golit të barazimit për vendasit. Topi i krosuar nga e djathta, përplaset tek Mehmedaj dhe përfundon në rrjetën e portës së mbrojtur nga Sherri. Në pjesën e dytë janë aktivizuar përveç këtij portieri edhe Miloti, Mehmedaj, Kukaj, Brahimi, Rajçeviq e Pusi. Për ta ndjekur këtë miqësore kanë qenë të pranishëm edhe dida tifozë shkodranë.
© shkodrasport.com
