Pas dy disfatave radhazi kundër dy prej skuadrave më të forta të kampionatit, Kukësit dhe Skënderbeut, për Vllazninë vjen një kundërshtar më i përballueshëm Lushnja.
Më i përshtatshëm për kampionatin e kuqebluve por absolutisht jo i lehtë, jo vetëm për brishtësitë që po tregon skuadra shkodrane, por edhe për faktin se “myzeqarët” pavarësisht pozitës në fundin e tabelës po i dhurojnë antagonizëm kampionatit dhe në shtëpi në përballjen e fundit ndalën edhe një skuadër cilësore si Luftëtari.
Megjithatë, për Vllazninë nuk ka alibi, tashmë pas Teutës në klasifikim.
Këtu fillon kampionati i kuqebluve dhe në Shkodër ndeshja përjetohet si një finale mbijetese. Në qendër të ciklonit, trajneri Gjoka, vjen pas një periudhe veçanërisht stresuese për të.
Në ambiente të ndryshme po përflitet se te Vllaznia kanë nisur që tani të kërkojnë pasuesin në rast të një dështimi, madje duke përmendur edhe emra konkretë.
Për trajnerin, që para 9 muajsh shijonte kulmin e karrierës, duke u shpallur kampion me Kukësin, duket se është një moment vendimtar. Vllaznia luan dy ndeshjet e radhës përballë Lushnjës dhe, më pas, rivalit më direkt për mbijetesën, Teutës.
Janë të dyja sfida që mund të vendosin fatin e Gjokës, ndaj Lushnjës këtë të shtunë, skuadrës i duhet të fitojë edhe për të./ supersport/
