Pas asaj me Kukësin, Vllaznia do të luajë një tjetër ndeshje në shtëpi. Kështu, në kuadrin e javës së gjashtë të kampionatit, të shtunën në orën 13.45 në stadiumin “Loro Boriçi”, ajo do të ndeshet me Bylisin.
Një 90 minutësh i vështirë, por për kuqeblutë nuk lejohet asnjë rezultat tjetër veç fitores. Kalendari i i këtyre javëve të para ka qenë përgjithësisht i favorshëm dhe ai duhet shfrytëzuar në maksimum sepse kampionati sa vjen e vështirësohet.
Edhe për ndeshjen e së shtunës Vllaznia do të ketë mungesa. Braziliani Victor da Silva nuk ia ka dalë të kalojë dëmtimin e pësuar në ndeshjen me Teutën dhe do të mungojë edhe në këtë ndeshje dhe duke shpresuar që të paktën të rikuperohet për takimin e së mërkurës me Kastriotin.
Një lajm i mirë është ndërkohë rikthimi pas skualifikimit i futbollistit Isaevski. Sa i takon formacionit, pritet të ketë ndonjë lëvizje në repartin sulmues. Gjasat janë që Ardit Hoxhaj ta nisë si titullar këtë ndeshje, por ende nuk është e qartë se në vend të kujt do të luajë. Futbollisti vlonjat po kalon një moment të mirë dhe e meriton një vend në formacion.
Nuk përjashtohet mundësia që ai të zërë vendin e Imerit, por mund të ketë edhe ndonjë lëvizje tjetër. Vllaznia edhe ndaj Bylisit pritet të luajë me të dy sulmuesit nga minuta e parë dhe prandaj Dilaver e Dunga do të kenë për detyrë të bëjnë mirë përpara.
Objektivi skuadrës shkodrane për këtë ndeshje është vetëm fitorja. Asaj, për vetë pretendimet që ka, nuk i bën punë as barazimi ndaj ballshiotëve sepse të tjera pikë të lënë pas atyre me Kukësin, do të krijonte jo pak probleme për vazhdimësinë./SHKODRA-SPORT.COM/
