Vllaznia vijon përgatitjet për takimin e Kupës me Flamurtarin, një përballje tejet e vështirë dhe delikate për kuqeblutë. Fitimi i kësaj ndeshjeje është më shumë se sa një obligim për futbollistët shkodranë.
Impenjimi dhe mobilizimi për këtë takim është shfaqur edhe gjatë këtyre ditëve stërvitore. Ditën e sotme, ekipi ka zhvilluar seancën e rradhës në fushën e kompleksit “Hasaj” në Golem. Trajneri Mirel Josa ka pasur të gatshëm pothuajse të gjithë futbollistët e tij, me përjashtim të Latifit, Heriç dhe Hakajt, të vetmit që vazhdojnë të mos stërviten me ekipin.
Edhe seanca e sotme stërvitore ka nisur me nxehmjen e zakonshme me disa vrapime dhe më pas me ushtrime të ndryshme. Më pas, trajneri Josa e ka ndarë ekipin në dy grupe, duke zhvilluar për disa minuta lojë me ekipin e tij, por në asnjë moment nuk ka lënë të kuptohet se kush do të jetë formacioni i parë.
Gjatë këtyre lojërave të shkurtra, trajneri Josa ka gërshëtuar futbollistët e tij, duke kërkuar që mes skuadrave të kishte rivalitet. Ajo që është vënë re në këtë proçes stërvitor, ka qenë se në skuadër ka mbizotëruar qetësia dhe për më tepër, besimi dhe optimizmi. Kjo seancë ka zgjatur për më shumë se 90-minuta dhe është shoqëruar edhe nga disa tifozë të pranishëm.
Maringlen ZHIVANI
