Stërvitja e së premtes ka shkuar në mënyrën e duhur për kuqeblutë e Vllaznisë. Ndonëse tek stafi teknik ka ekzistuar frika e një problemi në mbarëvajtjen e stërvitjes për shkak të kushteve atmosferike, në fakt çdo gjë ka shkuar ashtu si duhet.
Skuadra shkodran e kishte spostuar stërvitjen në fushën sportive “Reshit Rusi” ku për fatin e mirë gjatë gjithë zhvillimit të saj kanë rënë shumë pak ose aspak reshje shiu. Gjithsesi trajneri Gjoka duke dashur që ta zhvillojë të plotë procesin stërvitor, ka vendosur që edhe ditën e shtunë stërvitjen ta zhvillojë sërish në këtë fushë.
Menjëherë pas përfundimit të kësaj seance, kuqeblutë më pas do të nisen drejt Barbullushit pikërisht tek “Gardenland Resort” për t’u grumbulluar në pragndeshjen e rradhës me Laçin. Sakaq, përpara kësaj seance, do të zhvillohet edhe konferenca e zakonshme për shtyp e Vllaznisë teksa njëri nga pjestarët e stafit teknik apo nga futbollistët, do të dalë para gazetarëve për të folur në lidhje me takimin ndaj kurbinasve.
Ky është një takim që patjetër duhet fituar dhe padyshim që shkodranët do të tentojnë ta arrijnë. Ato i kanë fituar dy ndeshjet e fundit në kampionat, ndaj Lushnjës dhe Luftëtarit dhe pse jo, mund t’ia dalin të fitojnë edhe ndaj Laçit.
© shkodrasport.com
