Sezoni i ri 2017-2018 në volejboll është në prag dhe më datën 22 shtator do të luhen takimet e para, teksa do të ngrejë siparin Kupa e Federatës, aktiviteti që si zakonisht çel veprimtaritë e sportit të rrjetës. Në këtë aktivitet do të marrin pjesë 4 skuadrat e para të sezonit të fundit e më saktësisht Barleti Volej, Tirana, Partizani e Teuta për femra si dhe skuadrat e Vllaznisë, Farka Volley, Studentit e Partizanit për meshkuj.
Më 22 shtator do të luhen ndeshjet gjysmëfinale për femra dhe një ditë më pas ato të meshkujve. Ndërsa ditën e diel, më datën 24 shtator, do të zhvillohen ndeshjet finale në të dyja kategoritë. Ky event do të organizohet nga Federata Shqiptare e Volejbollit në sallën e lojërave me dorë “Feti Borova” në National Olimpik Park, në kryeqytet.
Sipas shortit paraprak, Vllaznia në gjysmëfinale do të ndeshet me ekipin Farka Volej ditën e shtunë dhe në rast fitoreje, që në fakt pritet, një ditë më vonë do të luajë në finale të këtij kompeticioni ku do të ndeshen me fituesin e çiftit Studenti-Partizani.
© shkodrasport.com
