Ndeshja e djeshme ndaj Skënderbeut ka qenë shumë e rëndësishme për ekipin e Vllaznisë.
Aq më tepër fitorja e arritur e cila e lë ekipin shkodran sërish brenda objektivave të tij.
Dy golat e shënuar nga Ribaj kanë rezultuar deçiziv apo dhe rastet e krijuara kanë dhuruar shumë emocione.
Por në fakt 95 minutat e këtij takimi kanë patur brenda edhe disa momente të cilat kanë nervozuar jo pak stafin teknik, futbollistët por edhe tifozët e pranishëm në stadium.
Sidomos në rastin e minutës së 14-të të ndeshjes. Vucaj nis një top për Çinarin që është në pozicion krejtësisht të rregullt por anësori Enea Pashaj ngre flamurin duke e cilësuar offside.
Në fakt, një veprim shumë i gabuar sepse çdo gjë ka qenë mëse e rregullt. Dhe të mendosh që ky aksion i ndalur ishte thuajse mohimi i një goli të sigurtë.
Rezultati në ato momente ishte 1-0 dhe mund të shkonte në 2-0 për ta mbyllur mbase ndeshjen.
Por po gjatë pjesës së parë, ka patur edhe një rast tjetër kur anësori Pashaj gaboi sërish.
Ndërkohë edhe vendimet e kryesorit Kridens Meta kanë qenë në disa raste të kontestuara nga shkodranët.
Për rrjedhojë, kjo do të thotë se për të dytën herë rradhazi Vllaznia ndjehet e penalizuar nga arbitrimet. Por nëse në Kukës javën e kaluar pikërisht prej këtij arbitrimi ajo nuk mori pikë, këtë herë për fat, kuqeblutë u larguan nga fusha me tre pikë. Ata shpresojnë që në 9 ndeshjet e mbetura deri në fund të kampionatit, të mos penalizohen më.
© shkodrasport.com
