Java e pestë e Superligës do të na dhurojë përballjen Vllaznia- Flamurtari, një ndeshje që pritet me interes në të dy kampet. Edhe interesimi i tifozërive pritet të jetë i madh. Klubi shkodran përmes një njoftimi në faqen zyrtare ka bërë të ditur se shitja e biletave do të nisë që nesër dhe nga sa mësohet, çmimet e tyre do jenë sërish shumë të favorshme.
Në 70 % të stadiumit, një biletë do të kushtojë vetëm 200 lekë të reja. Ja njoftimi i klubit Vllaznia:
KF Vllaznia sh.a bën të ditur se duke filluar nga dita e nesërme (e mërkurë) do të dalin në shitje biletat e ndeshjes Vllaznia- Flamurtari që do të luhet ditën e enjte në ora 14.00 në stadiumin “Loro Boriçi”. Gjithashtu ju bëjmë me dije se çmimet e biletave edhe për këtë ndeshje do të jenë shumë të favorshme për tifozët tanë. Kështu, një biletë në tribunat C, D dhe E do të kushtojë vetëm 200 lekë të reja, ndërsa në tribunat A dhe B do të kushtojë 500 lekë ndërsa bileta për tribunën VIP do të kushtojë 1000 lekë. Ju bëjmë thirrje tifozëve për të qenë të pranishëm në stadium dhe për ta mbështetur skuadrën tonë për arritjen e një fitoreje të mundshme në këtë përballje të vlefshme për javën e pestë të kampionatit.
