Kur pritej që ekipi i peshëngritjes së Vllaznisë të shpallej kampion i vendit për të tretin vit rradhazi, nuk ka ndodhur kështu. Në garat e zhvilluara sot në Elbasan, shtangistët shkodranë nuk kanë arritur dot të zënë vendin e parë në renditjen ekipore duke u renditur të dytët pas Elbasanit. Ajo që ka çuar në këtë dështim nëse mund të themi kështu, ka qenë mosrenditja e dy sportistëve në dygarësh. Pikërisht Gridi Jahja në peshën 69 kg nuk ka arritur të klasifikohet në dygarësh e të njëjtin fat ka patur në këtë peshë edhe 16 vjeçari Flogert Mali. Të dy këta sportistë ishin planifikuar për t’i dhënë pikë ekipit në mënyrë që ai të dilte kampion dhe kjo gjë ndikoi në renditjen përfundimtare.
Sa i takon sportistëve të tjerë, Erkand Qerimaj ka dalë kampion Shqipërie në peshën 85 kg dhe po në këtë peshë, Xhulio Prroni është renditur i dyti. Në peshën 94 kg, Marjan Bregu ka zënë vendin e parë në stilin e shkëputjes por nuk ka mundur ta mbajë këtë vend edhe në dygarësh duke u renditur i dyti. Në peshën +105 kg, Isa Bala ka dalë kampion Shqipërie. Në këtë mënyre, me dy vende të dyta dhe dy të para, Vllaznia është renditur e dyta si ekip duke mos arritur të sjellë në Shkodër titullin kampion për të tretin vit rradhazi.
www.shkodrasport.com
