U përfol se do të ishte një ekip malazez kundërshtari i Vllaznisë në ndeshjen e dytë miqësore por jo. Skuadra shkodrane ka arritur të sigurojë sot një tjetër miqësore për fazën përgatitore që po zhvillon në Ulqin. Por ndryshe nga sa mendohej, kundërshtari i kuqebluve nuk do të jetë një nga skuadrat malazeze me të cilat po bisedohej prej ditësh, por një ekip shqiptar. Trajneri i Tërbunit të Pukës, Kreshnik Krepi, nëpërmjet një postimi të shkurtër në rrjetet sociale ka bërë të ditur se të premten, ekipi i tij do të vihej përballë shkodranëve në Ulqin.
Krepi ka shkruar se ndeshja do të luhej të premten në orën 14:00. Kësisoj, Gjoka ka një telash më pak, pasi do të ketë mundësinë që të shohë në veprim skuadrën e tij duke mos u mjaftuar vetëm me miqësoren përballë ekipit U19 që zhvilloi pak ditë më parë. Nuk dihet ende nëse shkodranët do të luajë edhe ndeshjen me Mornar, një nga skuadrat malazeze e cila ishte parimisht dakord për të zhvilluar miqësore me ta.
© shkodrasport.com
