Ekipi i boksit të Vllaznisë është grumbulluar që sonte në prag të kampionatit kombëtar të të rriturve që starton javën e ardhshme në Shkodër. Grumbullimi një javë përpara nisjes së kampionatit, pritet të ndikojë për mirë tek sportistët në prag të këtij aktiviteti shumë të rëndësishëm. Një grumbullim i tij njëjavor tek hotel “Argenti” është mundësuar nga ana e dy presidentëve të këtij ekipi Flamur Hoxha dhe Gjergj Livadhi. Ata po i qëndrojnë afër skuadrës teksa kanë bërë të mundur edhe paisjen me bazë materiale e cila është blerë në Mal të Zi. Objektivi i Vllaznisë sigurisht që është ruajtja e titullit kampion por ky i këtij viti ka një të veçantë të madhe.
Nëse do fitohet sërish nga Vllaznia, do të jetë i 18-ti për të dhe ajo që është më interesantja sepse në të gjithë këto tituj të fituar, protagonist mbi të gjitha është një njeri: Zef Gjoni. Statistikat e sportit shqiptar zor të nxjerrin një trajner tjetër që të ketë fituar kaq tituj kampion sa ai. Megjithatë për t’ia dalë këtë herë nuk do jetë e lehtë sepse do ketë një konkurrencë shumë të madhe. Përveç Vllaznisë, për titullin kampion do luftojnë edhe dy ekipe të tjera, pikërisht Tirana dhe Dardania. Ekipi shkodran është i plotë në këtë pjesmarrje teksa do paraqitet me të gjitha peshat dhe objektivi është për të nxjerrë minimumi katër boksierë kampionë në peshat respektive.
www.shkodrasport.com
