Pasditen e së martës ekipi i Vllaznisë në basketboll për meshkuj ka luajtur një ndeshje miqësore në Ulqin ndaj skuadrës vendase. Interesant ka qenë fakti se basketbollistët shkodranë kanë patur kundërshtarë në këtë takim dy ish- basketbollistë të tyre, pikërisht malazezët Gjokoviç dhe Pajoviç. Ndeshja ka qenë e ekuilibruar dhe në tre periodat e para rezultati ka qenë thuajse gjatë gjithë kohës në barazim. Në periodën e katërt trajneri Gjeçaj ka aktivizuar edhe lojtarët e stolit dhe kjo është shfrytëzuar nga basketbollistët vendas që e kanë mbyllur ndeshjen me fitoren e tyre me 12 pikë diferencë. Megjithatë për stafin shkodran kjo nuk ka qenë ndonjë problem. Vllaznia ka filluar të përgatitet për takimet gjysmëfinale të play off-it që do nisin javën e ardhshme ndaj Kamza Basket por para se ta luajnë atë ndeshje, nesër në orën 17.00 në “Qazim Dervishi” do të luajnë ndeshjen e fundit të fazës së dytë të kampionatit, atë ndaj Partizanit.© shkodrasport.com
