Ditën e sotme do mbërrijnë në Shkodër dy futbollistë serbë, mbrojtësi Marko Boshkoviç dhe sulmuesi Marko Jaksiç. Ata do jenë për disa ditë në provë tek skuadra shkodrane dhe vetëm pas kësaj prove, stafi i Vllaznisë me në krye trajnerin Vata do vendosë nëse do qëndrojnë apo jo. Boshkoviç ka luajtur rregullisht në kampionatin serb të Superligës deri para pak ditësh kur është mbyllur faza e parë e tij. Ka qenë në fushë në 12 ndeshje për skuadrën e ti FK BSK Borca duke luajtur nga 90 minuta të plota në secilën prej këtyre ndeshjeve.
Ai ka qenë në fushë edhe në ndeshjet ndaj ekipeve të mirënjohura të Crvena Zvezdës, Partizanit të Beogradit, Vojvodinës etj. Boshkoviç është I datëlindjes 15.4.1982, I gjatë 1.84 m dhe peshon 79 kg. Të paktën nga të dhënat që ofrohen për të, duket se kemi të bëjmë me një qendërmbrojtës me shumë përvojë. Karrierën ky futbollist e ka nisur me skuadrën Trudbenik Beograd për të kaluar pastaj tek Sindjeliç po e Beogradit në kategorinë e tretë të këtij vendi dhe më pas kalimi tek ekipi actual BSK Borca në vitin 2004 do shënonte dhe rritjen më të madhe të karrierës së tij. Me këtë ekip, nga kategoria e tretë kalon në të dytën dhe në vitin 2009 ka shënuar hapin më të rëndësishëm të karrierës së tij duke luajtur në Superligën serbe. Me BSK Borca sivjet po luan për të tretin kampionat me rradhë përkrah emrave të mëdhenj të futbollit të këtij vendi si Crvena Zvezda e Partizan I Beogradit. Boshkoviç ka qenë në aktivitet me ekipin e tij deri më 3 dhjetor kur skuadra e tij ka luajtur ndeshjen e fundit të fazës së parë. Sulmuesi Jaksiç i datëlindjes 10.8.1983, I gjatë 1.85m ai e ka nisur karrierën tek Radniçiki I Beogradit ku ka luajtur për tre sezone me rradhë, pastaj ka kaluar tek FK Dorcol për të vazhduar me Borac Caçak e rad të Beogradit në Superligën serbe. Karriera e këtij sulmuesi më pas pëson rënie teksa luan në ligën e dytë dhe të tretë të Serbisë me ekipet Radniçki Pirot, Zelezniçar e Zemun ndërsa më pas, për dy sezone me rradhë ka luajtur në Kuvajt me ekipin e Al- Shabab. Rikthehet në Serbi me ekipin Metalac ndërkohë që në sezonin e fundit po luan me ekipin sllovak MFK Ruzomberok.
shkodrasport.com
