Vllaznia kërkon të mos ndalet ndaj Skënderbeut e të thyejë tabunë e fushës. Takimi i Vllaznisë ndaj Skënderbeut në Korçë do të mbyllë fazën e parë të kampionatit. Ky takim, që do të zhvillohet ditën e shtunë, do të jetë tejet delikat për vetë pozitat në të cilat ndodhen kuqeblutë.
Lojtarët kësaj here duhet që të mbështeten edhe tek e shkuara. Në tri vitet e fundit Vllaznia ka qenë dominuese në betejat ndaj Skënderbeut. Kuqeblutë numërojmë gjashtë suksese dhe tri barazime në nëntë ndeshjet e fundit. Ajo që vlen për t’u përmendur është finalja e Kupës në vitin 2021, kur Vllaznia fitonte 1-0 falë një goli të Da Silvës. Suksesi i fundit i korçarëve ndaj Vllaznisë daton më 11 korrik 2020, kur bardhe =kuqtë fitonin 2-1. Në atë ndeshje shënonte një shkodran, Belajdi Pusi.
Migen Memelli, i cili në të shkuarën ka drejtuar Skënderbeun, do të duhet të vijojë ecurinë pozitive ndaj korçarëve për të shmangur një krizë të kuqebluve. Të gjithë presin reagimin e ekipit pas disa rezultateve jo aq pozitive së fundmi. Por nga ana tjetër, djemtë e Memellit kanë edhe statistikat e këtij sezoni në disfavorin e tyre, kjo për sa u përket takimeve të luajtura në transfertë. Vllaznia nuk ka arritur që të fitojë në asnjë prej takimeve që ka zhvilluar jashtë shtëpisë. Kësaj here duhet parë se cila nga statistikat do të jetë në krahun e Vllaznisë. Ato do të kërkojnë të thyejnë tersin e fushës kundërshtare dhe njëherazi të vijojnë supermacinë e sezoneve të fundit ndaj bardhekuqve.
SËRISH ME MUNGESA – Vllaznia do të vijojë të ketë disa mungesa edhe në takimin ndaj Skënderbeun. Shkodranëve do t’u mungojnë gjashtë lojtarë, ku Krymi dhe Smajli vijnë si rrjedhojë i kartonëve. Katër lojtarët e mbetur mungojnë për shkak dëmtimesh, teksa lajmi i mirë vjen nga Esin Hakaj, i cili rikthehet i gatshëm për stafin teknik. Xhelil Asani, Flor Spahija, Bruno Gomesh dhe Kristi Qarri vuajnë ende dëmtimet dhe nuk pritet të jenë pjesë e ekipit. Portieri ka dalë së fundmi në stërvitje, por nuk është rikuperuar ende plotësisht.
Vetëm dy lojtarë kanë luajtur minuta të plota në këtë start sezoni me Vllazninë. I pari është Bekim Balaj, sulmuesi që ka shënuar 6 gola në Superiore dhe 1 në Ligën e Konferencës numëron 900 minuta deri më tani. Ku janë 10 ndeshje, 8 prej të cilave në kampionat dhe dy në Conference League. Futbollisti tjetër që ka pasur çdo minutë të sezonit në këmbët e tij është Milos Stojanoviç.
