Mungesa e sigurt e Viktor da Silvës në ndeshjen ndaj Skënderbeut do të sjellë ndryshime në formacionin e Vllaznisë. Në stërvitjen e fundit trajneri Thomas Brdariç ka lënë të kuptohet se lëvizjet do të prekin edhe repartin e mbrojtjes.
Gurishta ka luajtur si qendërmbrojtës në këto tri javë, ndërsa Kruja në krahun e djathtë. Tashmë pritet që kapiteni të rikthehet në pozicionin e tij natyral, atë të mbrojtësit të krahut. Titullar në qendër këtë herë pritet të jetë senegalezi Dianje, duke formuar dyshen me Adilin.
Në krahun e majtë rikonfirmohet Hakaj, i cili po kalon një formë mjaft të mirë. Mesfusha me tre lojtarë do të ketë sërish Krymin, Heriçin dhe Jonuzin.
Në fazën ofensive janë të sigurt Latifi në krahun e djathtë dhe Aralica në majën e sulmit. Ndërsa për një vend titullari luftojnë Kruja dhe Gjurgjeviç, për të plotësuar pjesën ofensive.
Seanca e sotme pritet të zbardhë të gjitha dilemat, teksa skuadra do të udhëtojë më pas drejt Korçës për ndeshjen e planifikuar të shtunën në orën 16:45.
Në sezonin e kaluar shkodranët fituan tri herë ndaj korçarëve, ndërsa një ndeshje përfundoi në barazim. Nesër kuqeblutë do të kërkojnë triumfin e dytë për këtë kampionat, në mënyrë që t’i afrohen sa më shumë Kukësit kryesues.
