Të mërkurën në orën 13.00 në stadiumin “Loro Boriçi” do të luhet ndeshja e kthimit e turit të dytë të Kupës së Shqipërisë në mes Vllaznisë dhe Tiranës. Takimi i parë, luajtur para dy javësh në kryeqytet siç dihet është fituar nga bardheblutë me rezultatin 2-0. Rezultat ky që i favorizon së tepërmi ata për të kaluar turin. Sakaq, Vllaznia duket se ka dëshirë ta provojë përmbysjen e këtij rezultati por shifrat dhe faktet nuk flasin në anën e saj.
Për të përmbysur këtë rezultat, së pari duhent të shënojë tre gola, gjë që nuk e ka bërë akoma deri më sot në këtë kampionat. Mbase mund ta bëjë këtë ndaj Tiranës. Por ndërkohë, problemi qëndron tek mbrojtja sepse nuk duhet pësuar. Ky në fakt është një shqetësim jo i vogël sepse mbrojtja kuqeblu “fut ujë”.
Thuajse në të gjitha ndeshjet. Në njërën gabon portieri, në tjetrën mbrojtja dhe kësisoj nuk ka shumë garanci. Po ashtu, në mbrojtje do ketë sërish mungesa edhe të mërkurën.Denis Pjeshka vazhdon të jetë i pamundur dhe prandaj mbrojtja do të jetë po ajo e ndeshjeve të fundit. Tifozët kanë pak shpresa për kualifikim por stafi dhe futbollistët janë të bindur se mund t’ia dalin.
© shkodrasport.com
