Ante Aralica pritet të prishë marrëveshjen me Vllazninë, por skuadra të tjera shqiptare mund të përfitojnë për afrimin e sulmuesit. “Panorama Sport” mëson se sulmuesi kroat që është pjesë e shkodranëve pëlqehet nga disa ekipe në Superiore, një prej të cilave Tirana.
Drejtuesit bardheblu vlerësojnë sulmuesin, paçka se ai nuk ka pasur hapësira tek ekipi i Josës, por deri tani nuk kanë bërë asgjë për shkak të aktivizimit të paktë. Deri tani nuk ka një pistë konkrete, pasi gjërat mbeten vetëm në kuadrin e pëlqimeve dhe të kushtëzuara nga faktorë të tjerë.
Për më tepër që Aralica ka kontratë me Vllazninë dhe nuk dihen dëshirat e tij nëse e prish marrëveshjen me shkodranët apo nuk dëshiron të luajë më në Shqipëri.
Vetëm pasi të jetë i lirë, Tirana dhe skuadrat e tjera mund të flasin për diskutime me Aralicën. Së fundmi, në Shkodër është diskutuar se ai që mund të largohet është sulmuesi Ante Aralica.
Këtij të fundit i mbeten edhe gjashtë muaj kontratë dhe nisur nga performanca në pjesën e parë të këtij sezoni, gjasat janë që të shkohet drejt prishjes së marrëveshjes me mirëkuptim.
Megjithatë, për momentin ende nuk ka asgjë konkrete dhe gjithçka pritet të mësohet në ditët e para të janarit, kur edhe drejtuesit të bëjnë bisedime konkrete me kroatin. Në fitoren e fundit ndaj Teutës, Aralica nuk u aktivizua fare dhe Josa preferoi të luante me brazilianin Kaina në majën e sulmit.
PËRSHTATJA – Kroati, edhe pse nuk është golashënues “dok”, mund të jetë shumë i vlefshëm për Tiranën në qendër të sulmit. Prej largimit të Ngosë dhe De Silvës, Tirana ka humbur peshë në sulm dhe rolin e qëndrorit në repartin e avancuar po e bën Patrik.
Gjithsesi, ardhja e Aralicës, gjithmonë nëse dëshirat e drejtuesve të Tiranës janë ende të njëjta mund të bëjë që mënyra e të luajturit të ndryshojë.Aralica është një qendërsulmues dhe mund të ndihmojë shumë në repartin e avancuar për të furnizuar krahët.
Tej pikëve, Tirana dominon ndaj të gjithë Superiores, sepse është skuadra më e mirë në sulm me 59 gola të shënuar dhe 26 gola të pësuar në vitin 2022.Bardheblutë kanë edhe golashënuesin e momentit në Superiore, Redon Xhixhën, si dhe kanë mbrojtjen më të mirë në kampionat.
