Tom Doshi dhe Vllaznia, një binom i pandashëm tashmë. Biznesmeni i njohur, ndonëse nuk shfaqet në publik dhe nuk bën asnjë deklaratë bombastike, nga ato të zakonshmet kur biznesmenë të ndryshëm shpenzojnë për ndonjë klub, ka vazhduar të mbajë premtimin e bërë javë më parë.
Pas fitores kundër Skënderbeut është bërë realitet edhe premio e radhës nga Doshi, sepse sot është shpërndarë shuma prej 5000 eurosh, që qëndron në fuqi për çdo fitore të Vllaznisë deri në fund të sezonit.
Një shifër aspak e vogël, por që përveç motivimit dhe mbushjes së xhepave të lotarive, vlen mbi të gjitha në aspektin psikologjik, sepse tashmë Vllaznia nuk është vetëm në duart e bashkisë dhe mbështetja e gjithanshme po ndihet.
Atmosferë entuziaste, klub i bashkuar, tifozët po shtohen në stadium dhe prania e një emri të njohur si Doshi natyrisht që shton ndjeshëm sigurinë e skuadrës.
“Sport Ekspres” mëson se bashkëpunimi i Doshit me Vllazninë nuk mbyllet te premio pej 5000 eurosh për fitore, sepse tashmë Doshi do të paguajë edhe për një pjesë të shpenzimeve për grumbullimin e skuadrës para çdo takimi shtëpiak.
Trajneri Ernest Gjoka ka kërkuar që për çdo takim në Shkodër skuadra të grumbullohet 48 orë para ndeshjes, për të pasur përqendrimin e duhur, ndërsa Doshi ka sponsorizuar gjysmën e grumbullimit.
Çka do të thotë se shifra që do të shpenzohet për akomodimin në hotelin ku qëndron skuadra do të ndahet mes bashkisë e biznesmenit, që vazhdon të japë një kontribut të çmuar./sport-ekspres/
