Vllaznia nuk e ka çuar me tej serine e saj te rezultateve pozitive pasi pasditen e sotme eshte ndalur nga Flamurtarin ne Vlore me rezultatin 0-2. Dy gola të realizuar përkatësisht nga një në çdo pjesë, me Bushiç që ka kaluar vlonjatët në avantazh në minutën e 7’ dhe Alves që ka sigluar fitoren më të rëndësishme të këtij sezoni në të 61’. Nga ana tjetër, dy traversat e Vllaznisë, të regjistruara nga Bardulla dhe Tafili, kanë qenë të pamjaftueshme për të ruajtur serinë e rezultateve pozitive. Pas kësaj fitore, skuadra e Flamurtarit ngrihet në vend të tetë, në kuotën e 31 pikëve, dy më shumë se Laçi dhe vetëm 1 pikë më pak se Teuta dhe Tirana, duke rritur kështu shanset e saj për shpëtim, por njëherësh duke rihapur më shumë se kurrë në këtë sezon luftën për mbijetesë me të paktën 4 skuadra potencialisht në rrezik.Pjesa e parë Ka nisur në mënyrën më të mirë të mundshme ky takim për skuadrën e Flamurtarit që vijon luftës për të shpëtuar nga kjo agoni e gjatë e rrezikut të rënies nga kategoria. Vlonjatët kanë kaluar në avantazh vetëm 7 minuta pas fillimit të takimit. Ishte Bushiç ai që ka shfrytëzuar në mënyrën më të mirë të mundshme atë krosim të Telushit nga goditja e dënimit, për të fituar duelin me mbrojtjen shkodrane, sikurse dhe me portierin e Vllaznisë, Selimaj, për të dërguar topin në rrjetë. Me epërsinë e siguruar që në fillim, vlonjatët nisin të administrojnë më mirë energjitë dhe hapësirat, ndërkohë që shkodranët tentojnë të përgjigjen me Bakajn por pa sukses. Tentativa më konkrete nga kampi i Vllaznisë regjistrohet në minutën e 33’, kur Halilaj ka neutralizuar një përpjekje të shkodranëve, pasi ka grushtuar një top të fuqishëm të goditur nga jashtë zone nga Gocaj.
Pjesa e dytë Edhe ky fraksion i dytë loje ka folur në favor të vendasve, të cilët shumë shpejt do të dyfishonin epërsinë e tyre ndaj shkodranëve. Rreth 15’ minuta nga rifillimi i takimit, Flamurtari ka thelluar epërsinë në 2-0, kësaj here falë golit të realizuar nga Alves. Braziliani triumfon mbi mbrojtjen e Vllaznisë për të goditur me kokë topin e servirur nga e djathta, për të mposhtur më pas edhe Selimajn, duke dërguar topin në rrjetë. Pas golit të dytë është Vllaznia ajo që përpiqet të reagojë, me rastin më flagrant në minutën e 71’, kur Bardulla ka goditur traversën, pas një gjuajte fantastike nga jashtë zone. Një tjetër traversë për shkodranët është regjistruar në minutën e 90’, kësaj here me protagonist Tafilin, por pavarësisht tentativave të Vllaznisë, porta e vendasve ka mbetur e paprekur deri në vërshëllimën e fundit të arbitrit.
© shkodrasport.com
