Ndeshja e nesërme ndaj Korabit konsiderohet shumë e rëndësishme për vazhdimësinë e kampionatit për ekipin e Vllaznisë. Ngushtimi i diferencës në pesë pikë me ndjekësin më të afërt, e bën të domosdoshme marrjen e tre pikëve në këtë përballje për kuqeblutë.
Një avantazh konsiderohet rikuperimi i mbrojtësit Malota i cili pasi ka lënë pas dëmtimin që ka patur, do të luajë në këtë takim që nga minuta e parë. Sëbashku me Ignat dhe Zeqajn do të formojnë treshen e qendrës së mbrojtjes.
Nga ana tjetër, pak më përpara do të jenë Gocaj e Gurishta por me ndryshimin e vetëm që këtë herë ky i fundit do të luajë në të djathtë dhe tjetri në të majtë. Kjo dyshe do të ndihmojë më së shumti mesfushën në të cilën do luajnë në qendër Krymi e Tafili.
Kapiteni Lika do të luajë në vendin e tij të zakonshëm në krah ndërkohë që ka një dyshim se kush do të përfundojë jashtë formacionit, Zogaj apo Hajdari.
Njëri prej tyre nesër do ta nisë nga pankina ndërkohë që në sulm i padiskutueshëm është braziliani Junior. Me këtë 11-she dhe me këtë formacion, Vllaznia do të kërkojë ta nisë me fitore fazën e dytë të kampionatit, për të shkuar më pas e sigurtë drejt arritjes së objektivit, ngjitjes në Superligë.
© shkodrasport.com
