Vllaznia do të luajë nesër sfidën e javës së 18-të të Abissnet Superiore. Skuadra shkodrane do të përballet me Kastriotin në transfertë dhe ndeshja do të luhet në stadiumin e Kamzës, teksa do të nisë në orën 13:45.
Trajneri Brdariç ka vendosur të bëjë disa ndryshime në formacion nga ndeshja e kaluar për shkak të mungesave, edhe pse ditën e nesërme do të vendoset përfundimisht. Nga ajo që u pa sot në stërvitjen e fundit, trajneri Thomas Brdariç ka lënë të kuptohet se do të ketë disa lëvizje.
Vllaznia do të tregohet e kujdesshme në përballjen me Kastriotin duke e nisur ndeshjen me një skemë, si 4-4-2.
Kështu, në portë do të jetë Bojan Zogoviç. Kapiteni Gurishta, që në ndeshjen e fundit ndaj Flamurtarit, ka luajtur si qendërmbrojtës, tashmë pritet që të rikthehet në pozicionin e tij natyral, atë të mbrojtësit në krahun e djathtë. Titullar në qendër këtë herë pritet të jetë malazezi Bulatoviç, duke formuar dyshen me Adilin. Në krahun e majtë rikonfirmohet Hakaj, i cili kaloi një dëmtim që kishte javën e kaluar ndaj Egnatias.
Mesfusha do përbëhet me katër lojtarë, teksa do të ketë Heriç në të djathtë, Jonuzi, Krymi në qendër dhe Mustedangic në të majtë. Në fazën ofensive do të jetë Latifi, pas shpinës së Gjurgjeviç, teksa ky i fundit do të jetë në majën e sulmit.
Kështu, trajneri Brdariç ka projektuar formacionin, me të cilin, Vllaznia do të zbresë nesër në fushë në ndeshjen e planifikuar ndaj Kastriotit, në orën 13:45. Në këtë mënyrë, me këto ndryshime, Vllaznia do të kërkojë të mposhtë Kastriotin, për të iu afruar edhe më shumë kreut.
Në fazën e kaluar, shkodranët fituan ndaj krutanëve, me rezultatin 3-1. Nesër kuqeblutë do të kërkojnë triumfin e dytë për këtë kampionat ndaj Kastriotit, në mënyrë që t’i afrohen sa më shumë skuadrave kryesuese.
Maringlen ZHIVANI
