Ndonëse tek Vllaznia duket se po projektohen lëvizje të reja, deri më tani asgjë nuk ka ndryshuar.
Ka shumë dilema për të ardhmen e kësaj skuadre tashmë të rënë në kategorinë e parë dhe në opinionin sportiv të gjithë presin ndryshime rrënjësore.
Dhe jo vetëm në skuadër por edhe në drejtimin e klubit. Krerët e lartë të tij prej disa ditësh kanë nisur kontaktet me një grup specialistësh të qytetit të Shkodrës dhe sëbashku po krijojnë fizionominë e Vllaznisë së re.
Në këtë grup janë emra të shquar të futbollit shkodran si Sabah Bizi, Paulin Ndoja, Taip Piraniqi, Agim Medja, Lazer Matija, Mhill Shkëmbi, Suad Lici, Armir Grima, Edi Martini e të tjerë.
Ata kanë dhënë mendimet e tyre si duhet të ndryshojë Vllaznia dhe në dy takimet që kanë patur me kryebashkiaken Ademi kanë filluar të krijojnë edhe idenë për këtë gjë.
Gjithsesi në ditët e ardhshme, këto takime pritet të dalin në një konkluzion përfundimtar për të ardhmen e klubit shkodran.
Ndryshime priten në të gjitha drejtimet, duke filluar nga futbollistët, stafi teknik dhe për të vazhduar edhe me drejtuesit e klubit.
Natyrisht që këto lëvizje kanë qenë në njëfarë mënyre të detyrueshme duke parë rënien e Vllaznisë nga Superliga.
Skuadra duhet të nisë një projekt të ri dhe ai nuk duhet të jetë sa për kthimin e saj në Superligë por edhe për vazhdimin më tej dhe rikthimin sa më shpejt në nivele të larta.
Gjithsesi, për të parë zhvillimet konkrete mesa duket duhet të presim edhe disa ditë. Skuadra është pushim aktualisht dhe është në pritje të lajmeve që do të vijnë nga klubi.
Lajme këto që pikësëpari do të startojnë me emërimin e trajnerit të ri. Emrat kanë filluar të bëhen publikë ndërkohë që trajneri i cili e drejtoi atë në dy ndeshjet e fundit, pikërisht Ervis Kraja.
Ai me të drejtë pretendon të vazhdojë punën. Megjithatë çdo gjë do të marrë zgjidhje brenda pak ditësh.
www.shkodrasport.com
