Në tre ndeshjet e fundit, Erjon Vucaj është shndërruar në lider të Vllaznisë. Loja e tij në mesfushë ka vënë në lëvizje të gjithë skuadrën dhe këtë gjë po evidentojnë edhe specialistët.
Një nga mesfushorët më të shquar të Superligës shqiptare të këtyre viteve të fundit, nuk po kalonte një moment të mirë.
Që pas largimit nga Laçi, ai nuk gjeti vetëveten si tek Flamurtari ashtu edhe tek Tirana.
Por ndërkohë, edhe tek Vllaznia në gjysmën e parë të sezonit, nuk u ngjit aty ku duhet.
Megjithatë nga ndeshja në ndeshje ai filloi ngjitjen. Kuptohet duke punuar fort në stërvitje. Duke lënë mënjanë edhe pakënaqësitë e tifozëve apo dhe fjalët jo të mira në lidhje me kthimin e disa shkodranëve tek Vllaznia.
Eri uli kokën dhe punoi shumë fort. Ndërsa sot, merr duartrokitjet e të gjithëve. Vucaj po rikthehet në ditët e tij më të mira.
Fantazisti po shndërrohet në lider të Vllaznisë. Megjithatë kjo që ka bërë deri tani nuk mjafton.
Skuadra është ende në pozita jo të mira dhe prandaj ky mesfushor por edhe pjesa tjetër e futbollistëve duhet t’i shtojnë edhe një tjetër marsh për t’i dhënë asaj pikët e duhura në mënyrë që të arrijë objektivin që ka.
Pasi të arrihet kjo, pastaj do jetë histori tjetër. Edi Martini u ka bërë thirrje drejtuesve të Vllaznisë për të rinovuar që tani kontratën me këtë futbollist dhe kjo do të ishte zgjedhja e duhur për të sepse do ishte mëkat që ai të largohej sërish nga Shkodra.
© shkodrasport.com
