Ndriçim Shtubina nuk është i vetmi i pakënaqur me Vllazninë aktuale. Bashkë me të janë edhe shumë të tjerë. Për të mos thënë të gjithë shkodranët, ata që e duan këtë skuadër dhe këtë emër të madh të futbollit shkodran. Ata që kanë qenë në stadium ditën e mërkurë në ndeshjen e kupës ndaj Flamurtarit sigurisht që janë larguar tepër të mërzitur. Jo aq nga eliminimi sepse kjo edhe mund të ndodhte por më tepër nga loja zhgënjyese e kuqebluve. 90 minuta shumë të dobëta nuk mund të justifikohen tërësisht me fjalët e trajnerit Vata pas ndeshjes se ekipi ishte i lodhur nga ndeshjet e shumta që ka zhvilluar. Themi kështu sepse deri para pak ditësh, nga goja e trajnerit por edhe e stafit të tij përmendej shpeshherë fjala “ekip i shëndetshëm”. Nëse ky shëndet ka zgjatur vetëm një muaj e gjysëm pas fazës përgatitore, atëherë është çështje tjetër. Ajo çfarë konstatohet në opinion është se kjo Vllazni nuk mund të dhurojë më tepër.
Kontigjenti i lojtarëve që ajo ka në përbërje të saj, nuk premton për më shumë. Megjithatë për këtë ekip është investuar, ka patur korrektësi nga ana e klubit dhe pikërisht këto faktorë duhet ta bëjnë këtë skuadër më të përgjegjshme ndoshta. Më të përgjegjshme sepse pas golit të Flamurtarit dje, nuk pamë më Vllazni në fushë. Ishte një ekip krejtësisht i shthurruar ku nuk kishte më as taktikë, as skemë loje dhe as dëshirë pë rtë luajtur. Kjo nuk është normale dhe mbase për këtë, drejtuesit e klubit duhen ndalur. Dy humbjet e fundit në Shkodër duhen analizuar. Pse jo të ketë edhe masa ndëshkimore. Vllaznia nuk është mësuar të jetë një ekip i rëndomtë. Drejtuesit e klubit duhet të reagojnë sepse nëse skuadra vazhdon në këtë rrugë, ajo do ta ketë jo të lehtë edhe në vazhdimin e kampionatit. Me 23 pikët që ka aktualisht në renditje, nuk është shumë e qetë aq më tepër nga kalendari i vështirë i ndeshjeve në vazhdim. Prandaj dhe skuadra duhet të reagojë. Sa më parë, në mënyrë që nesër të mos jetë vonë.
www.shkodrasport.com
