Vllaznia është nisur mesditën e së martës drejt Korçës ku një ditë më pas do të luajë ndeshjen e fundit të këtij kampionati, atë ndaj kampiones së vendit, skuadrës së Skënderbeut.
E sigurtë është që futbollistët dhe stafi shkodran do të jenë pjesmarrës në një festë, atë të korçarëve që kurorëzohen për herë të tetë kampionë të Shqipërisë.
Normalisht që do të ishte mirë që festa të ishte dyfishe dhe bashkë me korçarët të ishin edhe shkodranët duke festuar.
Këta të fundit për qëndrimin e tyre sërish në Superligë.
Megjithatë, deri në përfundim të këtyre ndeshjeve të javës së fundit, të gjithë tifozët e Vllaznisë por edhe pjestarët e saj do të jenë në ankth.
Vëmendja e tyre nuk do të jetë e përqendruar vetëm tek ndeshja e Korçës por më së shumti tek ajo që do të zhvillohet në Tiranë në mes Partizanit dhe Kamzës.
Ndërkohë, ekipi shkodran i ka dhënë fund përgatitjeve për ndeshjen me Skënderbeun dhe më pas është nisur drejt Korçës.
Trajneri Kraja sërish nuk do ta ketë të plotë kontigjentin e lojtarëve për këtë sfidë të fundit.
Nëse është rikuperuar Ribaj, i është shtuar listës së mungesave mesfushori Tafili.
Ai i bashkohet Orelesit dhe Bardullës. Megjithatë këto nuk janë justifikime.
Vllaznisë i duhet të marrë me çdo kusht fitoren dhe të mbesë deri në fund me shpresën e mbijetesës.
Kuptohet, për të menduar pastaj për një organizim ndryshe për sezonin tjetër.
www.shkodrasport.com
