Sezon mund të quhet përfundimisht I dështuar tashmë për Vllazninë. I kanë mbetur për të luajtur edhe 9 ndeshje kampionati megjithatë nuk pritet shumë prej tyre. Renditja më e mirë e mundshme e skuadrës mund të jetë vendi I pestë (ndoshta edhe I katërti) megjithatë kjo do jetë e vështirë. E rëndësishme është që kjo situatë të mos precipitojë më keq. Kalendari I ndeshjeve të mbetura është aspak I favorshëm për kuqeblutë. Luajnë të hënën në Tiranë ndaj bardhebluve, presin Flamurtarin në Shkodër dhe pastaj dy transferta rradhazi jashtë, Pogradec dhe Ballsh. Për fatin e madh të Vllaznisë, ndeshjet me disa nga skuadrat e vendeve të fundit, me Apoloninë, Tomorin dhe Shkumbinin, luhen në “Loro Boriçi” dhe prandaj mund të ketë pak qetësi sepse me 32 pikë praktikisht Vllaznia nuk ndjehet e rrezikuar. Por që të mos ndodhë kështu, sigurisht që ka vend për një analizë të hollësishme. Të shumë gjërave. Dështimi në kupë, loja aspak e ngrohtë dhe disa probleme që shfaq kjo skuadër duhen analizuar mirë. Por në Bashkinë Shkodër, insititucion ky që e drejton aktualisht këtë klub, askush nuk e ka mendjen aty. Kryetari I Bashkisë Lorenc Luka që është njëkohësisht edhe presidenti I klubit, dihet botërisht se nuk është tifoz futbolli. Ai ia ka deleguar të drejtat nënkryetarit Troshani por kur vjen puna për të vendosur, sigurisht që nuk mund të vendosë. As ai dhe asnjë drejtues tjetër poshtë tij. Tek Vllaznia e sotme, duket qartë se ka mungesë të kërkesës së llogarisë. Ata që kanë qenë në stadium ditën e mërkurë në ndeshjen e kupës ndaj Flamurtarit sigurisht që janë larguar tepër të mërzitur prej tij. Jo aq nga eliminimi sepse kjo edhe mund të ndodhte por më tepër nga loja zhgënjyese e kuqebluve. 90 minuta shumë të dobëta nuk mund të justifikohen tërësisht me fjalët e trajnerit Vata pas ndeshjes se ekipi ishte i lodhur nga ndeshjet e shumta që ka zhvilluar. Themi kështu sepse deri para pak ditësh, nga goja e trajnerit por edhe e stafit të tij përmendej shpeshherë fjala “ekip i shëndetshëm”. Nëse ky shëndet ka zgjatur vetëm një muaj e gjysëm pas fazës përgatitore, atëherë është çështje tjetër. Ajo çfarë konstatohet në opinion është se kjo Vllazni nuk mund të dhurojë më tepër. Kontigjenti i lojtarëve që ajo ka në përbërje të saj, nuk premton për më shumë. Megjithatë për këtë ekip është investuar, ka patur korrektësi nga ana e klubit dhe pikërisht këto faktorë duhet ta bëjnë këtë skuadër më të përgjegjshme ndoshta. Më të përgjegjshme sepse pas golit të Flamurtarit dje, nuk pamë më Vllazni në fushë. Ishte një ekip krejtësisht i shthurruar ku nuk kishte më as taktikë, as skemë loje dhe as dëshirë pë rtë luajtur. Kjo nuk është normale dhe mbase për këtë, drejtuesit e klubit duhen ndalur. Dy humbjet e fundit në Shkodër duhen analizuar. Pse jo të ketë edhe masa ndëshkimore. Vllaznia nuk është mësuar të jetë një ekip i rëndomtë. Gjërat mund të ndryshojnë nga ndeshja e ardhshme teksa shkodranët pas “surprizës së hidhur” që I bënë dy javë më parë Teutës, mund ta përsërisin këtë gjë edhe me Tiranën tashmë. Kuqeblutë duket se tashmë “nuk janë më për hajër”. Ata mund të bëhen protagonistë të sezonit vetëm duke u bërë keq skuadrave të tjera. Durrsakët e pësuan prej tyre. Mbase tani është rradha e të tjerëve. Vetëm në këtë mënyrë, Vllaznia mund të përmendet këtë sezon sepse për rezultate të veta, çdo gjë ka dështuar.Gjergj KOLA
