Lajme të mira për basketbollin shkodran. Një nga basketbollistët më të spikatur të Vllaznisë në tre sezonet e fundit, malazezi Nikolla Gjokoviç rikthehet sërish në rradhët e saj. Lajmi është konfirmuar për shkodrasport.al nga inspektori i lojërave me dorë në klubin Vllaznia Astrit Zaganjori i cili ka qenë njeriu i cili ka negociuar këto kohët e fundit me këtë basketbollist dhe sot ka arritur ta bindë që të rivishet kuqeblu. “Mund të konfirmoj faktin se basketbollisti Nikolla Gjokoviç do të luajë sërish për Vllazninë. Kam biseduar gjatë me të duke e bindur se ana financiare nuk është më ajo e mëparshmja për ne ngaqë kemi patur probleme këto kohët e fundit megjithatë falë mbështetjes së presidentit Sokol Dibra, ia dolëm që ta bindim këtë lojtar të jetë sërish pjesë e jona. Sot është në Shkodër dhe pasdite do të shohë ndeshjen që do të luajmë ndaj Flamurtarit ndërkohë që nga e hëna do të nisim procedurat e federimit të tij dhe besoj se javën e ardhshme do të jetë në fushë me fanellën e Vllaznisë. Por përveç tij, jemi në bisedime edhe me basketbollistin Mirza Sarajlija, edhe ky një emër shumë i njohur për sportdashësin shkodran dhe shpresojmë që edhe me të të arrijmë akordin sepse duam ta kemi edhe atë në rradhët tona”- ka thënë Zaganjori që është edhe krahu i djathtë në pankinë i trajnerit Bledar Gjeçaj. Vllaznia e ka nisur kampionatin pa patur asnjë sportist të huaj por duket se ata nuk garantojnë titullin e tretë kampion dhe për këtë arsye, drejtuesit e shoqatës së basketbollit janë munduar të bëjnë edhe një tjetër “sforco” në merkato duke marrë Gjokoviç dhe ndoshta shumë shpejt edhe Sarajlijën, dy lojtarë me peshë dhe që kanë dhënë një kontribut shumë të madh për Vllazninë në fitimin e dy titujve kampionë sezonet e kaluara.Gjergj KOLA
