Lojë e mirë e kuqebluve por ata sërish janë të pafat. Ndaj Partizanit në “Loro Boriçi” ata janë mundur me rezultatin 0-1. Miqtë e kanë nisur këtë takim menjëherë në avantazh, falë golit të shpejtë të realizuar nga Basrak. Ky i fundit ka gjetur rrugën drejt rrjetës në minutën e 4’, pasi ka shtyrë me kokë për në portë një top të krosuar nga Trashi.
Një gol që ka vendosur fatin e takimit, pasi mes lojës pa shumë raste, i vetmi për tu përmendur më pas ishte ai me Gilman Likën protagonist. Veterani i shkodranëve ka vënë në provë portierin e Partizanit, Alban Hoxha, në minutën e 64’ kur ka goditur fuqishëm dhe saktë nga jashtë zone, por topi qëndror dhe aftësitë e gardianit të të kuqve, kanë bërë që rreziku të neutralizohet në dy kohë. Të kota kanë rezultuar përpjekjet e shkodranëve në minutat e mbetura, ndërkohë që të kuqtë arritën misionin e tyre, të mbronin epërsinë e vendosur që në fillim të takimit. Duhet thënë se skuadra jonë shfaqi më shumë dëshirë në fushën e lojës por duket se ka ende për të përmirësuar në lojën e saj në mënyrë që të mbërrijë tek rezultatet e dëshiruara.
