Mosgjetja e gjuhës së përbashkët për likujdimin e shumave financiare që lojtari kërkonte, ka bërë që çështja të shkojë në FIFA. Bëhet fjalë për ish- futbollistin e Vllaznisë Mohamad Kdouh i cili u largua nga Shkodra në fund të muajit dhjetor të vitit që shkoi. Ai, duke mos marrë paratë që i takojnë, e ka kërkuar këtë gjë nga institucioni i futbollit botëror. Në klubin shkodran sigurisht që janë në dijeni të këtij problemi dhe madje kontaktet me lojtarin kanë qenë të shpeshta por nuk kanë gjetur gjuhën e përbashkët me të për shkak të disa detajeve financiare.
Libanezi që erdhi me bujë në gusht tek Vllaznia, ka luajtur shumë pak për kuqeblutë sepse tregoi që nuk kishte ndonjë vlerë të veçantë dhe duke parë që nuk ishte në planet e trajnerit Grima që mori drejtimin e skuadrës pas dorëheqjes së Luan Zmijanit, preferoi të largohej nga Shqipëria. Me pretekstin se nuk ishte paguar por edhe ngaqë Vllaznia nuk i kishte siguruar leje- qëndrimi, ai është larguar para përfundimit të kontratës. Administratori i ri i klubit Astrit Gjyrezi, që në momentin e marrjes së detyrës në janar, ka insistuar për mbylljen e kësaj marrëveshje me mirëkuptim ashtu siç u veprua me gjithë futbollistët e tjerë të huaj, por libanezi Kdouh nuk pranoi. Ai kërkon të marrë edhe një këst kontrate të muajit janar (kur braktisi ekipin në fund të dhjetorit!!!) dhe pikërisht kjo ka qenë “kleçka” për të cilën dy palët nuk kanë rënë dakord. Tashmë çështja ka shkuar në FIFA dhe pritet vendimi i saj.
© shkodrasport.com
