Emri i Xhevahir Sukajt nuk është i vetmi që do t’i bashkohet Vllaznisë gjatë kësaj periudhe. Një gjë të tillë e konfirmon më së miri numri i reduktuar i futbollistëve që trajneri Gjoka do të marrë me vete në Ulqin. Sot në orën 11.30 ekipi shkodran niset drejt bregdetit malazez për një stërvitje 12 ditore dhe në gjirin e tij do të jenë vetëm 19 futbollistë. Duket se stafi teknik ka lënë bosh edhe tre vende të tjera për të plotësuar 22-shen që i nevojitet për të përballuar pjesën e dytë të kampionatit.
Me siguri që këto futbollistë do t’i bashkohet ekipit në Ulqin. Sa i takon pjesës tjetër të futbollistëve të cilët nuk do të udhëtojnë me ekipin, sot pritet të mësohet më tepër. Me shumë mundësi, ata do të bashkohen në stërvitje me ekipin “B” gjatë kësaj periudhe në mënyrë që pas kthimit pastaj nga Mali i Zi të jenë pse jo pjesë e ekipit të parë sërish. Por fakti që ata janë nën kontratë me klubin, bën që stërvitja me ekipin e dytë të jetë e detyrueshme dhe për më tepër, nuk është ndonjë problem sepse sot me ekipin e parë janë edhe portieri Vjerdha, mbrojtësi Ruqi dhe mesfushori Hajdari që deri dje stërviteshin me trajnerin Kraja. Gjërat mund të përmbysen sërish dhe e rëndësishme është që ata të ruajnë formën e tyre.
www.shkodrasport.com
