Pasditen e sotme Vllaznia ka zhvilluar një ndeshje kontrolli. Ndonëse jo e plotë në minutazh (është luajtur vetëm 60 minuta), ajo i ka shërbyer trajnerit Lika të shohë gjendjen reale të secilit prej futbollistëve.
Në fund të ndeshjes ka qenë ekipi i dytë ai që ka fituar me rezultatin 2-1. Të parët kanë kaluar në avantazh në fakt ata që mund të quhen titullarët e ardhshëm të Vllaznisë që kanë shënuar me anë të Alsid Tafilit.
Në fund të pjesës së parë ka barazuar me 11-metërsh Denis Balaj për ekipin tjetër. Në pjesën e dytë ndërkohë ka ardhur edhe goli i fitores për ekipin e dytë shënuar nga futbollisti Mario Kola.
Në formacionin e parë nëse mund ta quajmë të tillë, trajneri Lika ka aktivizuar: Sherri, Gocaj, Santana, Gurishta, Marku, Krymi, Mehmedaj, Lika, Tafili, Hajdari dhe Pusi.
Janë aktivizuar me këtë ekip në pjesën e dytë edhe Selimaj, Smajli, Kukaj e Borshi. Ndërkohë në formacionin e dytë kanë luajtur Selimaj, Borshi, Kukaj, Isufi, Smajli, Balaj, Lushaj, Djepaxhia, Shaba, Dyca dhe Galica.
Janë aktivizuar edhe Vjerdha, Kola, Ruqi, Rahova, Fikaj e Palushani. Duhet thënë se ka qenë një ndeshje kontrolli e cila nuk ka treguar ndonjë vlerë të veçantë.
Sigurisht që nuk mund të pritej më tepër sepse skuadra ka vetëm pak ditë që ka filluar stërvitjen dhe lojtarët janë ende në fazën e marrjes së ngarkesave stërvitore.
© shkodrasport.com
