Mbrëmë u luajt ndeshja mes Vllaznisë dhe Teutës e vlefshme për javën e 5-të të Superiores. Takimi përfundoi në shifrat 2-0.
“Shkodra Sport” sjell për lexuesit e saj edhe disa “pikante” të duelit mes kuqebluve dhe “djemëve të detit”.
-Ka një takim miqësor para fillimit të sfidës mes Dodev dhe Chemshmijedev të Vllaznisë me Ilijazin e Teutës. Të 3 futbollistët vijnë në kampionatin tonë nga Maqedonia e Veriut.
-Një numër i pakët tifozësh në stadium. Orari i darkës dhe moti i përshtatshëm duket se nuk kanë nxitur mbështetësit shkodranë që kanë qenë të zhgënjyer nga performancat e kuqebluve.
-Nuk mungon as edhe një përqafim mjaft miqësor mes Balajt dhe Dajes. Dy futbollistë që në të shkuarën kanë luajtur bashkë tek Tirana.
-Nga tifozët ka edhe batuta për orarin kur po zhvillohet takimi. Ku drejtohen me fjalët: “Po na duket si ndeshje e huaj në këtë orar”.
-Nuk kursehen as batutat për dy trajnerët, ku tifozët “kapen” me veshjen e tyre. Duke thënë se pas ndeshjes do kenë një darkë shtetërore.
-Xhaja merr kohë për një vendim që mund të sillte penallti për Vllazninë. Pritja e tij nervozon Memellin që kërkon që gjyqtari ta ndajë mendjen.
-Longo bisedon gjatë me Peposhin në një moment pushimi. Italiani jep disa udhëzime për anësorin e sulmit durrsak.
-Protestat e shumta sjellin karton të verdhë për Ideal Lekiqin. Trajnerin e portierëve të Vllaznisë që nuk është dakord me një vendim të kryesorit Xhaja.
-Fiton penallti Vllaznia, Balaj që është goditësi i 11 metërshave vendos t’ia lërë Krymit. Ka kundërshtim nga stafi teknik, që kthen vendimin e sulmuesit, i cili e godet e e dërgon topin në rrjetë.
-Nuk e mban vendi Memellin që kërkon golin e tretë, ku Vllaznia humbet dy raste të pastërta brenda pak minutash.
-Tenton të ndalë një top që del nga fusha trajneri Longo. Italiani nuk arrin ta zotërojë sferën dhe në tribuna plas ironia me fjalët “bravo Longo”.
-Del me barrelë nga fusha i dëmtuar Asani, mbrojtësi i majtë merr duartrokitjet e tifozëve.
-Memelli e ka me Gruden, në një moment që sulmuesi humb një top dhe nuk kthehet. Kjo e nervozon së tepërmi trajnerin e shkodranëve.
-Barrela hy sërish në fushë, kësaj rradhe për Qarrin që lë fushën i dëmtuar edhe ai.
-Në një moment Cheshmijedev bën rolin e përkthyesit mes Memellit dhe Dodev. Pasi sulmuesi dhe trajneri nuk po arrin të kuptoheshin mes tyre.
-Ka një episod të veçantë në momentet e fundit të sfidës. Portieri Dema i Teutës ndëshkohet me të kuq dhe në katërkëndor shkon Beqja. Duke qenë se durrsakët i kishin konsumuar zëvendësimet.
-Mbyllet 2-0 në fund në favor të Vllaznisë. Sukses që nxjerr disi nga forma jo e mirë ekipin kuqeblu dhe zhyt akoma më tepër atë durrsak.
Endri ÇINARI
